Археолошкиот музеј на Република Северна Македонија во Скопје (https://amm.org.mk/) основан во 1924 година, е првата институција што чува археолошки артефакти во Македонија. Колекциите на монети и камени споменици од римскиот период најпрво биле пренесени во Куршумли ан, и до денес ова се едни од најголемите збирки од овој вид на Балканот. Во текот на изминатиот век, Музејот има развиено дваесет типолошки разновидни збирки кои ги опфаќаат сите предисториски и историски периоди, од палеолитската ера (со артефакти кои датираат од 155.000 п.н.е.) до археологијата на 19 и 20 век.

Лапидариумот на Музејот, неговата прва збирка, сега може да се пофали со неколку стотици камени предмети, вклучувајќи и многу натписи на грчки и латински јазик. Оваа збирка содржи ретки и значајни камени споменици како што се декрети, списоци на ефеби, посвети на римските императори, миљокази и тестаменти. Освен тоа вклучува и бројни надгробни споменици и заветни споменици.

Горди сме што главниот координатор на проектот доаѓа од оваа институција — талентиран член на тимот кој активно придонесува за нашиот потфат: Славица Бабамова. Славица е кустос советник за епиграфика и камена пластика во Археолошкиот музеј. Била раководител и учествувала во бројни епиграфски истражувања во Тиквешкиот и Брегалничкиот регион, Големо Градиште во Коњух, Кратово и Исар кај Марвинци, Валандово.

Нејзините истражувачки интереси се фокусирани на грчката и латинската епиграфија, римските провинции, просопографијата на античка Македонија и ономастиката во антиката. Славица е автор на повеќе научни статии и монографии, меѓу кои и Епиграфски споменици од Република Македонија датирани според македонската провинциска ера, ИНИ, Скопје (2005), корпус на натписи од Стоби Inscriptiones Stoborum, НУ Стоби (2012) и Епиграфски споменици од Плаошник - Охрид (со К. Кузман Додевска), НУ Завод и Музеј, Охрид (2021). Славица е уредник и на изданието Inscriptiones Graecae Epiri, Macedoniae, Thraciae, Scythiae. Pars II. Inscriptiones Macedoniae. Fasc. II: Inscriptiones Macedoniae septentrionalis. Sectio 2: Inscriptiones in vallibus fluviorum Axii, Astibi, Strumicae inventae, BBAW, De Gruyter, Berlin ‒ Boston (2023).