Ве запознаваме со партнерските институции на проектот ПРОМЕТЕЈ: Филозофскиот факултет при Универзитетот во Белград, Србија.
Ве запознаваме со партнерските институции на проектот ПРОМЕТЕЈ: Филозофскиот факултет при Универзитетот во Белград, Србија.
Филозофскиот факултет при Универзитетот во Белград (https://www.f.bg.ac.rs/en2), основан во 1838 година, е најстарата и најпрестижна институција за високо образование во Србија, како и една од најстарите во Југоисточна Европа. Со 255 наставници и околу 6.000 студенти, факултетот нуди над 800 предмети во рамките на десет катедри. Располага со современи услови за работа, десет катедарски библиотеки и над 40 научни центри и институти, и претставува лидер во академската изврсност. Факултетот активно учествува во бројни национални и меѓународни проекти, вклучувајќи програми финансирани од ЕУ, како што се Erasmus, Horizon и ERC.
Активностите од проектот ПРОМЕТЕЈ се спроведуваат од страна на Катедрата за класични науки при Филозофскиот факултет на Универзитетот во Белград (https://www.klasicnenauke.rs/), единствената високообразовна институција во Србија каде се обучуваат класични филолози. Таа претставува централно јадро и највисок научен авторитет за истражувања од областа на класичната антика, вклучувајќи грчка и латинска лингвистика, грчка и римска книжевност, византиска и доцнолатинска книжевност, како и културна историја на античкиот свет.
Во рамките на Катедрата функционираат две значајни истражувачки единици:
– Институтот за антика и класично наследство, кој го издава списанието Lucida intervalla (https://www.klasicnenauke.rs/lucida-intervalla/), како и други научни монографии и учебници;
– Центарот за библиска филологија и херменевтика.
Катедрата со гордост ќе го одбележи своето 150-годишно постоење во 2025 година.
Од Катедрата за класични науки при Универзитетот во Белград во проектот ПРОМЕТЕЈ учествуваат двајца истакнати членови на тимот:
❦ Војин Недељковиќ е редовен професор на Катедрата за класични науки. Тој има учествувано во повеќе научни проекти посветени на лингвистиката и епиграфското наследство и е автор на бројни значајни монографии од различни области на класичните студии, како и на голем број трудови објавени во реномирани национални и меѓународни списанија. Неговите главни истражувачки интереси се латинската филологија, вулгарниот латински, доцнолатинскиот јазик, епиграфскиот латински и библиската филологија.
❦ Јелена Вукојевиќ е докторанд и истражувачки асистент на истата катедра. Таа ги завршила и додипломските и магистерските студии по класични науки на Филозофскиот факултет, со специјализација во стилските особености на латинскиот јазик низ различни жанрови и историски периоди. Моментално е секретар на редакцијата на списанието Lucida intervalla. Нејзиното истражувачко поле го опфаќа латинскиот јазик и (дигиталната) епиграфика, со особен интерес за античките јазици, култури и нивната настава.