Ве запознаваме со партнерските институции на проектот ПРОМЕТЕЈ: Институтот за балкански студии при Српската академија на науките и уметностите.

Ве запознаваме со партнерските институции на проектот ПРОМЕТЕЈ: Институтот за балкански студии при Српската академија на науките и уметностите.

Институтот за балкански студии при Српската академија на науките и уметностите е уникатна истражувачка институција во Србија, препознатлива по својот фокус на долгорочните процеси кои го обликуваат Балканот – од праисторијата до современото доба (https://www.balkaninstitut.com/eng/). Во својата работа применува мултидисциплинарен пристап, кој ги вклучува историјата, историјата на уметноста, археологијата, етнологијата, антропологијата, историјата на книжевноста и лингвистиката. Истражувачката дејност на Институтот е организирана во пет тематски оски и вклучува учество во бројни национални и меѓународни проекти.

Институтот бил основан во 1934 година по иницијатива на кралот Александар I Караѓорѓевиќ. Оваа година Институтот ја слави својата 90-годишнина!

Институтот има и активна издавачка дејност, која ги вклучува Серијата на специјални изданија и мултидисциплинарното научно списание Balcanica (https://balcanica.rs/index.php/journal).

Во рамките на проектот ПРОМЕТЕЈ, активно учествуваат двајца членови од Институтот. Со задоволство ви ги претставуваме Драгана Николиќ и Данило Савиќ:

✨ Драгана Николиќ (род. Грбиќ) е виш научен соработник во Институтот за балкански студии при САНУ. Таа е раководител на една од петте истражувачки теми на Институтот: „Балканот во праисторијата и антиката: интердисциплинарни истражувања“, и е главен истражувач во проектот за дигитална епиграфика. Од 2018 година е и член на Управниот одбор на Институтот. Нејзини истражувачки интереси се античката историја и епиграфиката, со особен фокус на епиграфските и историските студии за Централниот и Западниот Балкан. Николиќ е редовен соработник на L’Année Épigraphique. Во проектот ПРОМЕТЕЈ, таа е координаторка од страна на Институтот за балкански студии при САНУ.

✨ Данило Савиќ е истражувачки асистент во Институтот за балкански студии при САНУ. Тој е дипломиран класичар на Универзитетот во Белград и магистер по индоевропска лингвистика на École Pratique des Hautes Études во Париз. Моментално е докторанд на заедничка докторска програма (cotutelle) помеѓу École Pratique des Hautes Études и Филозофскиот факултет при Универзитетот во Белград. Неговата докторска дисертација, под менторство на Емануел Дипра и академик Александар Лома, носи наслов:
«Contacts entre les langues de l’Italie et des Balkans pendant l’antiquité: le cas du messapien et des vestiges linguistiques de l’Illyricum»
(Јазични контакти меѓу Италија и Балканот во антиката: случајот со месапскиот јазик и лингвистичките остатоци од Илирик).

Неговите истражувачки интереси ги опфаќаат античките јазици на Балканот, месапскиот јазик и италските јазици. Во проектот ПРОМЕТЕЈ, тој е член на тимот за комуникација и дисеминација.