Што претставува проектот „Прометеј“?
Со овој проект навлегуваме во фасцинантниот свет на старогрчките и римските натписи, каде што изветвените камени плочи сè уште носат речити пораки од одамна минати цивилизации.
Епиграфијата е како социјалните медиуми на античкиот свет. Старите цивилизации не твитаа и не ставаа фотографии на Инстаграм – тие ги врежуваа своите новости во камен или метал. Имале разни „објави“: јавните натписи биле како службени владини твитови, приватните – како лични пораки, надгробните – како меморијални страници на Фејсбук, а графитите – оригиналните објави на ѕид. Овие трајни начини на комуникација покажуваат дека човекот отсекогаш имал потреба да го сподели својот живот и мисли, без разлика на епохата.
Проектот „Прометеј“ е заедничка иницијатива за дигитализација на богатото епиграфско наследство на Југоисточна Европа и Балканот, во која се вклучени институции од Северна Македонија, Србија и Бугарија. Проектот има за цел да ги зајакне капацитетите на овие институции за создавање дигитални епиграфски корпуси, за примена на постојните и развој на нови ресурси и модели. Најголемата важност на проектот лежи во тоа што натписите од сите три држави ќе бидат вклучени во една дигитална збирка. Богатото античко грчко и римско епиграфско наследство во овие земји ја наметнува потребата од ваква иницијатива за дигитализација.
Целта е да се исплетат нишките на историјата, културата и образованието преку слободна онлајн-достапност на овие богатства. Така секој, од каде било, ќе може да ги истражува овие историски обележја – не само како остатоци од минатото, туку како живи делови од европското наследство што и денес нè инспирираат.
Нашата мисија е да ги отвориме вратите на музеите за сите, создавајќи мост низ времето преку универзалните вредности што непрекинато чукаат низ историјата!
